१ जेठ, २०७६
रामेछाप– रामेछापको खाँडादेवी गाउँपालिकामा स्थानीय सरकार गठन पश्चत चरम भ्रष्टाचार भएको भन्दै नेपाली काग्रेस खाँडादेवी गाउँपालिकाले ध्यानाकर्षण पत्र बुझाएको छ । स्थानीय तहको निर्वाचन सम्पन्न भएको दुई बर्ष पुग्दा पनि खाँडादेवी गाउँपालिकाको गाउँ–गाउँमा पारदर्शी विकास हुनुको साटो अनियमितता सँगै भ्रष्टाचार मौलाउदै गएको भन्दै तत्काल अनियमितता रोक्न माग गर्दै काँग्रेसले मंगलबार ध्यानाकर्षण पत्र बुझाएको हो ।
स्थानीय तहको निर्वाचनमा खाँडादेवी गाउँपालिकामा नेपाली काँग्रेसको तर्फबाट अध्यक्षमा पराजित बेदराज लामाको नेतृत्वमा ९ वटै वडाका वडा अध्यक्षमा पराजित उम्मेद्वार सहितको टोलीले यस अघि पनि अनियमितता रोक्नको लागि पालिकाको ध्यानाकर्षण गराएको तर त्यसको बेवास्ता गरिएको भन्दै फेरि पालिकालाई ध्यानाकर्षण पत्र बुझाउनु परेको ध्यानाकर्षण पत्रमा उल्लेख गरिएको छ ।
चार बुँदामा आफ्ना माग सहित ११ जनाले हस्ताक्षर गरेको ध्यानाकर्षण पत्रमा पालिकाले पूर्वाधार, शिक्षा, स्वास्थ्य, कृषि र सडक बिस्तार जस्ता महत्वपूर्ण कामहरू प्रमुख प्रतिपक्षी दल नेपाली काँग्रेस र स्थानीय नागरिकलाई समेत सहभागि नगराई बजेट बिनियोजन गरिएको लगाएतका बिषयमा गम्भिर आरोप लगाईएको छ । खाँडादेवी गाउँपालिकामा न्यायोचित ढङ्गले विकास नभए नोपली काँग्रेस जस्तोसुकै कदम चाल्न समेत पछि नपर्ने भन्दै काँग्रेसले चेतावनी समेत दिएको छ ।
सूचनाको हक बमोजिम सबै सूचना दिन तयार छौं : अध्यक्ष तामाङ
खाँडादेवी गाउँपालिकाका अध्यक्ष प्रेम बहादुर तामाङले काँग्रेसले ध्यानाकर्षण पत्रमा उल्लेख गरे जस्तो पालिकामा कुनै पनि अनियमितता नभएको जिकिर गर्नुभयो । अध्यक्ष तामाङले खाँडादेवीको काँग्रेसले विना प्रमाण भ्रष्टाचार गरेको भनेर अफवाह फैलाउने काम गरेको भन्दै त्यसो नगर्न आग्रह गर्नुभयो । उहाँले पालिकाबाट भएका काम गाउँ–गाउँमा गएर हेर्न समेत आग्रह गर्नुभयो ।
यस अघि पनि ज्ञापन पत्रमा मात्र पालिकाले गरेको कामको विवरण पाउँ भनेर माग गरेको बताउँदै अध्यक्ष तामाङले पालिकाबाट भएका सबै कामको विवरण सूचनाको हक २०६४ बमोजिम माग गरे आफूले तत्काल उपलब्ध गराउने बताउनुभयो ।
यो बारेमा तपाईको प्रतिकृया