रामेछाप,२९ बैशाख । माध्यामिक शिक्षा परीक्षा (एसइई) २०८२ को नतिजा अनुसार रामेछापमा यस वर्ष ८१.३२ प्रतिशत विद्यार्थी ग्राउण्डेड भएका छन् । प्रकाशित परिणाम अनुसार प्राविधिक धार तर्फ शतप्रतिशत नतिजा आउँदा सामुदायिक तथा संस्थागत विद्यालय तर्फ अधिकांश विद्यार्थी ग्रेडेड हुन सफल भएका छन् ।
जिल्लाका ८५ सामुदायिक र ३ संस्थागत विद्यालयका विद्यार्थी एसइईमा सहभागी भएकाेमा नियमितको साधारण तर्फ २ हजार १ सय ३६ र प्राविधिक तर्फका १ सय ४४ गरी कुल २ हजार २ सय ८० विद्यार्थी परीक्षामा सहभागी भएका शिक्षा विकास तथा समन्वय इकाई रामेछापका प्रमुख नेत्रप्रसाद गजुरेलले जानकारी दिनुभयो ।
जसमा १ हजार ८ सय ५४ विद्यार्थी ग्रेडेड र ४ सय २६ विद्यार्थी नन–ग्रेडेड गरी जिल्लाको समग्र ग्रेडेड प्रतिशत ८१.३२ प्रतिशत र साधारण धारतर्फ ८०.०६ प्रतिशत विद्यार्थी ग्रेडेड भएका छन् भने प्राविधिक धारतर्फ सहभागी सबै १ सय ४४ विद्यार्थी उत्तीर्ण भएको पनि प्रमुख गजुरेलले बताउनुभयाे ।
प्राप्त परिणामलाई जीपीएमा ढाल्दा सबैभन्दा बढि ६ सय २४ विद्यार्थीले २ दशमलव ८१ देखि ३ दशमलव २० सम्मको जीपीए हासिल गरेका छन् । २ दशमलव ४१ देखि २ दशमलव ८० जीपीए ल्याउने विद्यार्थी हरुको सँख्या भने ४ सय ५७ रहेको छ ।
त्यसैगरी ३.२१ देखि ३.६० जीपीए ल्याउने विद्यार्थिको संख्या ४ सय ११ रहेको छ भने ३.६१ देखि ४ जीपीए हासिल गर्ने हरुको संख्या २ सय ८६ पुगेको पनि उक्त कार्यालयले जनाएको छ ।
त्यस्तै जिल्लाभरीबाट ४ जीपीए ल्याउने विद्यार्थी संख्या ३६ रहेको पनि शिक्षा विकास तथा समन्वय इकाई रामेछापले जनाएको छ ।
यो बारेमा तपाईको प्रतिकृया