रामेछापको २ पालिकामा काँग्रेस, १ मा माओवादीको बहुमत र अन्य पालिका मा गठबन्धन

रामेछाप । रामेछापको एउटा पालिका बाहेक सबै पालिकामा कार्यपालिकाको निर्वाचन सम्पन भएको छ । निर्वाचन कार्यालयको आज सम्पन्न कार्यपालिकाको निर्वाचन तालिका अनुसार खाँडा देवी गाउँपालीका वाहेक अन्य ७ वटा पालिकामा कार्यपालिका गठनको कामले पुर्णता पाएको हो ।
जिल्लामा रहेका कुल ८ वटा पालिका मध्ये नेपाली काँग्रेसले रामेछाप नगरपालिकामा ८ सदस्यीय र गोकुलगंगा गाउँपालिकामा ६ सदस्य पालिकाका लागि निर्वाचित भएका छन् । काँग्रेसले बहुमतको आधारमा एक्लौटी पालिका हुने निश्चित गरेको हो । त्यसैगरि सुनापति गाउँपालिकामा माओवादी केन्द्रले पनि एक्लौटी ६ जना कार्यपालिका सदस्य निर्वाचित गरेको छ ।
त्यसैगरी अन्य पालिकामा नेपाली काँग्रेस संग गठबन्धन गरेको माओवादी केन्द्रले मन्थली नगरपालिका,उमाकुण्ड गाउँपालिकामा भने नेकपा एमाले संग गठबन्धन गरि कार्यपालिका निर्माण गरेको छ ।। जस अनुसार मन्थलीको ८ मध्य एमालेबाट ६ र माओवादी केन्द्रबाट २ सदस्य निर्वाचित भएका छन् । एक्लौटी मन्थलीमा मेयर र उप मेयर तथा उमाकुण्डमा अध्यक्ष जितेको एमालेले कार्यपालिकामा एकल बहुमत नपुग्ने भएपछि दुईमा माओवादी केन्द्र संग गठबन्धन गरेको हो ।
दोरम्बा र लिखु तामाकोशि गाउँपालिकाको पनि कार्यपालिकाले आजै पुर्णता पाएको छ । दुवै गाउँपालिकामा नेपाली काँग्रेस र नेकपा माओवादी केन्द्रले गठबन्धन गरि उमेद्वारी दिएका थिए । जसका कारण नेकपा माओवादी बाट ४ र नेकाले लिखुमा २ सदस्य पाएको छ । ८ मध्य बाँकि रहेको खाँडादेवी गाउँपालिकाको भने कार्यपालिकाको निर्वाचन आगामी २० गते मात्र हुने भएको मुख्य निर्वाचनको कार्यालय मन्थलीले जनाएको छ । उक्त पालिकाको एक वडामा निर्वाचन पछि भएकोले पालिकाको निर्वाचन पनि पछि सरेको कार्यालयले जनाएको छ ।
मन्थली र उमाकुण्डमा एमाले र माओवादीवीचको अर्थपुर्ण गठबन्धन र नेपाली काँग्रेसमा नेतृत्वमा देखिएको दम्भ र अपरिपक्वतापनका कारणलाई अनुमान गर्दा आगामी जिल्ला समन्वय समितिको निर्वाचन पनि यिनै दुई पार्टी बिच तालमेल हुने सम्भावना रहेको जानकारहरुले बताएका छन् । आठ वटा स्थानीय तह रहेको रामेछाप जिल्लामा एक्लै जिल्ला समन्वय समिति गठन गर्न ९ मत आवश्यक पर्दछ । जसमा नेपाली कांग्रेससँग सात मत छ । नेकपा एमालेसँग ६ मत छ भने, माओवादी केन्द्रसँग तीन मत भएकोले यस पटक समन्वय समितिको मुख्य निर्णायक माओवादीकेन्द्र बनेको छ ।