कुमार श्रेष्ठ- विद्यालय व्यवस्थापन समिति बनाउन विभिन्न राजनीतिक खिचातानीका कारण विवाद हुँदा समिति बन्न नसकेका समाचारहरु आइरहेका बेला रामेछापको एक विद्यालयमा भने सर्वसम्मत रुपमा एक योग्य व्यक्तिको नेतृत्वमा समिति गठन भएको छ । जिल्लाको मन्थली नगरपालिका–२ कठजोरमा रहेको नीलकण्ठेश्वर माविले जिल्लाको शैक्षिक जगतमा अब्बल मानिने मन्थली सहिद स्मृति बहुमुखी क्यामपसका पूर्व क्याम्पस प्रमुख गुञ्ज बहादुर श्रेष्ठलाई अध्यक्षमा चयन गर्दै वडाको शैक्षिक विकासमा त्यहाका स्थानीयले राम्रो कामको थालनी गरेका छन् ।
विद्यालयको ६६ औं अभिभावक भेलाले श्रेष्ठलाई अध्यक्षमा चयन गरेको हो । त्यस्तै सदस्यहरुमा रामकुमार श्रेष्ठ, रमेश बरुवाल, स्वस्तिमा तामाङ, शान्तादेवी अधिकारी र याममाया खत्री सर्वसम्मत चयन भएका छन् । विद्यालयका प्रधानाध्यपक रामचन्द्र अधिकारी सदस्य सचिबमा चयन हुनुभएको छ ।
नव निर्वाचित अध्यक्ष श्रेष्ठले नीलकण्ठेश्वर माविको शैक्षिक सुधारको लागि नयाँ योजनाका साथ अगाडी बढ्ने प्रतिबद्धता व्यक्त गर्नुभयो । उहाँले गुणस्तरिय शिक्षाको लागि स्थानीय नागरिकले पनि उत्तिकै भूमिका निर्वाह गर्नु पर्नेमा जोड दिनुभयो ।
यो बारेमा तपाईको प्रतिकृया