रामेछाप,३ चैत । रामेछापको सुनापति गाँउपालिकामा हुन लागेको सुनापति–शैलुङ अन्तराष्ट्रिय अल्ट्रा म्याराथन प्रतियोगिताको अन्तिम तयारी पुरा भएको छ ।
जिल्लामा पहिलो पटक हुन लागेको उक्त प्रतियोगिताका लागि रुट निर्धारण, चेकप्वाईन्ट तयारी लगाएतका सम्पूर्ण तयारी पुरा भएको र प्रतियोगिता शनिबार विहानबाट शुरु हुने आयोजकले जनाएको छ ।
सुनापति गाउंपालिकाको सांधिडाडाबाट सुरु हुने उक्त प्रतियोगिता रामेछाप र दोलखाको सिमा क्षेत्र शैलुङ पुगेर टुंङ्गिने छ । ५५, २५ र ५ किलोमिटर लामो उक्त प्रतियोगिता राष्ट्रिय खेलकुद परिषदले आयोजना गरेको हो ।
सो प्रतियोगिताको लागि सुनापति गाउँपालिका र दोरम्बा शैलुङ गाउँपालिका र जिल्ला खेलकुद विकास समिति लगाएतले स्थानीय व्यवस्थापनको जिम्मेवारी लिएका छन् । प्रतियोगितामा भाग लिन आउने क्रम शुक्रवार साँझ सम्म जारी रहेको छ । प्रतियोगिताका छुट्टा छुट्टै प्रतिस्पर्धामा कुल २ सय २० जना धावकहरुले भाग लिने जनाइएको छ ।
आयोजकले दिएको जानकारी अनुसार प्रतियोगिता अन्तर्गत ५५ किलोमिटर लामो म्याराथन प्रतियोेगिता हिलेदेवी, गाल्वा, खांडादेवी,दोरम्बा,निगलाबास, डडुवा धारा, घलेडाडां हुदै शैलुङ पुग्नेछ । उक्त प्रतियोगिता अन्तर्गत म्याराथनका लागि स्वदेशी र विदेशी समेत ५० जना धावकले नाम दर्ता गराएको आयोजकले जनाएको छ ।
सुनापतिबाट सिधै शैलुङ पुग्ने २५ किलोमिटर म्याराथनमा १ सय १ जना र शैलुङडाडांमा मात्र सिमित ५ किलोमिटर लामो म्याराथनमा ६९ जना धावकले नाम दर्ता गराएका छन् । प्रतियोगितामा बेलायत,अमेरीका, स्वीडेन, जर्मनी लगाएतका विदेशी तथा नेपाली धावकहरुले प्रतिस्पर्धा गर्न लागेका हुन् ।
यस अघि नेपाल पर्यटन बोर्डले प्रवद्र्धन गरेको आदिवासी जनजाति पदमार्ग र पर्यटकिय स्थान शैलुङको प्रचारका लागि उक्त म्याराथन आयोजना गरिएको हो । प्रतियोगिताले स्थानीय जनजिवन, पर्यटन र शैलुङको सौन्दर्यलाई विश्वसामु प्रचार गर्ने उद्धेश्य राखिएको छ । ३ हजार १ सय ४७ मिटर अग्लो शैलुङडाडांलाई पर्यटकिय गन्तव्यको रुपमा विकास गर्नका लागि यस अघि पति पर्यटन मन्त्रालय, प्रदेश सरकार र स्थानीय तहले पूर्वाधार विकासका लागि विभिन्न कामहरु गर्दै आइरहेका छन् ।
यो बारेमा तपाईको प्रतिकृया