२ असार, २०७६
मन्थली– जिल्ला प्रशासन कार्यालय रामेछापले आफ्नो कार्यालयमा सेवा लिन आउने सेवाग्राहीहरूको स्वास्थ्य अवस्थालाई ध्यानमा राखेर निःशुल्क स्वास्थ्य परिक्षण सुरु गरेको छ । जिल्लाका दुर्गम ठाउँका सर्वसाधरणरू अझै पनि विशिष्ट किसिमका स्वास्थ्य सेवा लिनबाट बञ्चित भएको र उनीहरूलाई ती सेवाको बारेमा जानकारी सँगै आफ्नो स्वास्थ्यको बारेमा पूर्ण जानकारी होस भन्ने उद्देश्यका साथ साप्ताहिक स्वास्थ्य परिक्षणको सुरुवात गरिएको कार्यालयले जानकारी गराएको छ ।
सोमबारबाट सुरु गरिएको साप्ताहिक स्वास्थ्य परिक्षण हप्ताको प्रत्येक सोमबार गरिने प्रमुख जिल्ला अधिकारी लिला कुमारी के.सी. पाण्डेले जानकारी गराउनुभयो । जिल्ला प्रशासनमा सेवा लिन आउने सेवाग्राहीहरू आफ्नो काममा बढी केन्द्रित हुने हुँदा आफ्नो व्यक्तिगत स्वास्थ्यको बारेमा संवेदनशिल नहुँदा भविष्यमा स्वास्थ्य सम्बन्धी ठूलो समस्या आउन सक्ने भएकाले त्यसलाई न्यूनिकरण गर्नको लागि कार्यालमा स्वास्थ्य परिक्षणको सुरुवात गरिएको पनि प्रजिअ के.सी. पाण्डेले बताउनुभयो ।
स्वास्थ्य सम्बन्धी काम जिल्ला प्रशासनको क्षेत्राअधिकार भित्र नपर्ने भए पनि सर्वसाधरणका लागि राज्यबाट उपलब्ध हुने स्वास्थ्य सम्बन्धी सबै सेवाको बारेमा पूर्ण जानकारी नहुँदा कतिपय नागरिकहरू उपचारबाट बञ्चित हुनु परेकाले त्यसको जानकारी सँगै स्वास्थ्य सम्बन्धी चेतनाको लागि निशुल्क स्वास्थ्य परिक्षणले थप टेवा पुग्नेमा आफू विश्वास्ता रहेको प्रजिअ के.सी. पाण्डेले बताउनुभयो ।
स्वास्थ्य परिक्षण पछि सेवाग्राहीले औषधी सेवान गर्नु पर्ने भेटिए सरकारले निःशुल्क उपलब्ध गराउँदै आएको औषधी समेत उपलब्ध गराउने पनि उहँले बताउनुभयो ।
सेवाग्राहीका लागि ल्याइएको सेवाको उद्घाटन गर्दै जिल्ला समन्वय समिति रामेछापका प्रमुख प्रेम बहादुर खड्काले जनतासँग प्रत्यक्ष रुपमा जोडिएको प्रशासनले राम्रो कामको सुरुवात गरेको बताउनुभयो । उहाँले प्रशासनले ल्याएको सेवालाई निरन्तरता दिन जिल्ला समन्वय सधै लागि पर्ने बताउनुभयो । त्यसैगरी मन्थली नगरपालिकाका नगर प्रमुख रमेश कुमार बस्नेतले आम नागरिकको स्वास्थ्य प्रति स्थानीय सरकार प्रतिबद्ध भएर लागेको समयमा जिल्ला प्रशासनले निःशुल्क रुपमा ल्याएको स्वास्थ्य परिक्षण राम्रो भएको बताउनुभयो ।
उता स्वास्थ्य परिक्षणको लागि निःशुल्क रुपमा चिकित्सक उपलब्ध गराएर सहयोगीको भूमिका खेलेको तामाकोशी सहकारी अस्पतालका निर्देशक गोविन्दप्रसाद घिमिरेले आगमी दिनमा पनि प्रशासनले सुरु गरेको सेवालई अस्पतालले सहयोग गरी रहने बताउनुभयो ।
जिल्ला प्रशासन कार्यालय रामेछापको आयोजना तथा मन्थली नगरपालिका र तामाकोशी सहकारी अस्पतालको व्यवस्थापनमा भएको पहिलो दिनको स्वास्थ्य परिक्षणमा कार्यालयमा नागरिकता, पासपोर्ट लगायत विभिन्न सिफारिस लिन आउने सेवाग्रहीहरूले आफ्नो स्वास्थ्य परिक्षण गराएका छन् ।
यो बारेमा तपाईको प्रतिकृया